BLOGGER TEMPLATES AND TWITTER BACKGROUNDS »

الثلاثاء، ٣١ أغسطس ٢٠١٠

وفات النص يا رمضان



وفات النص يا رمضان

ولسه فينا ناس ناسيه

ولسه فينا ناس قاسيه

وفينا ناس محستهاش


وفات النص يا رمضان

ولسه فينا ناس تبعد

وناس مع نفسها بتعند

وفينا ناس ماركعتهاش


وفات النص يا رمضان

وفينا لسه ناس صايمه

لكن لسه النفوس عايمه

وذل التقوى ماوصلهاش


وفات النص يا رمضان

وفينا لسه ناس قايمه

لكن وسط القيام نايمه

خشوع النفس لسه مجاش


وفات النص يا رمضان

وبرنامج ورا مسلسل

عشان كدا تبقى متسلسل

مع البيبسى مع الجلاش


وفات النص يا رمضان

ولسه الناس مع الياميش

لكن تقوى دى ماتلاقيش

ولسه الجاى هايبقى بلاش


وفات النص يا رمضان

وفينا لسه ناس غافله

وفينا لسه ناس قافله

مصاحف لسه دورها مجاش


وفات النص يا رمضان

ياترى ممكن نفوق تانى

نركز فى النص التانى

دا رمضان خيرة ما يخلاش


د/عمرو فاروق.

18 التعليقات:

صيدلانيه طالعه نازله يقول...

كل نص رمضان و انت طيب يا عمرو
انا السنه دى بقى مش شفت و لا تابعت اى حاجه
شربت بيبسى اه
لكن مش اكلت جلاش
ههههههههههههههههههههههه
ياريت ربنا يرزقنا الهدوء و الخشوع و التقوى
و يملا نفوسنا بالراحه و الاطمئنان

كيــــــــــــارا يقول...

كل سنة وانت طيب ياعمرو

وربنا يتقبل منا ياااااارب

Unique يقول...

ربنا يباركلنا في الباقي من رمضان ويتقبل منا ومنكم

لـــولا وزهـــراء يقول...

دكتور عمرو

كل ثانيه وانت بخير وصحه وهنا ربنا يرزقك بالخير كله ويبارك لك فى ابنك يارب .......

فات نص رمضان وفى ناس مش حسيت ان رمضان هل علينا اصلا ...
فات نص رمضان وفى ناس الشيطان معشش فى قلوبها وعقولها ...
فات نص رمضان وفى ناس بتدعى انها تبلغ ليلة القدر....

ربنا يكرمنا جميعا يااااااااااارب

المهم انك عفو كريم تحب العفو فاعفو عنا جميعا ياااااااااااارب


زهـــــــراء

أبو كريم يقول...

حلوه بجد

تحياتى

gogo!sf يقول...

جميله اوى يا عمرو
وفعلا وصفك حقيقى لمعظم الناس
اصل مش كلهم لسه فى غافله

رمضان كريم يا دكتور
وكل سه وانت طيب

دموع القمر يقول...

تصدق انى كنت لسه بقرا القصيدة دى فى الجرنال

وبأسمك كمااااااان ياريس
:):)

كل سنة وانت طيب يادكتور
بس بجد انا واخدة على خاطرى من حضرتك

Ms Venus يقول...

كل سنة وانت بخير يا دكتور

re7ab.sale7 يقول...

ازيك يا دكتور
كل رمضان وانت بخير النهاردة سبعة وعشرين يعني خلاص رمضان خلص وكل سنة وانت طيب وعيد فطر سعيد عليك يا رب انت واسرتك
بس الغريبة ان برغم التدين ف المظهر اللي الناس طلعت فيه من سنين فاتت التدين الحقيقي مش ظاهر وللأسف السنة دي حاسة انها اسوء من قبلها لاني اكتشفت ناس كتير لا بتصلي ولا حتي بتصوم واهي اسمها مسلمة وخلاص ...ربنا يعافينا منهم
وكل سنة وانت طيب وكل المدونين بخير

غير معرف يقول...

كل سنه وحضرتك طيب .... ومعذره لعدم متابعتي لمدونتك في رمضان :)

عيد سعيد :)

gogo!sf يقول...

كل سنه وانت طيب ياعمرو
وعيد سعيد عليك وعلينا جميعاً

نـــــــــــــور يقول...

كل سنة وانت واسرتك بخير يادكتور
بقالى كتير مادخلتش مدونتك :)

romansy يقول...

بهديكم بوكيه من الورورد على أنغام أحلى عود ودايما العيد عليكم يعود كل سنة وانتم دايما بخير

عيد سعيد على كل الناس الطيبين

Mona يقول...

ياترى أختفيت تانى ليه يادكتور يارب يكون خير إن شاءالله.

فاروق بن النيل يقول...

د/ عمرو فاروق .........
لسة فاكر رمضان داحنا عدينا المحرم وصايمين دلوقتى عاشوراء معلش أصل أنا اللى إتأخرت ياصاحبى
شعرك شعبى أصيل فيه معانى حميلة يسلم قلمك وشعرك
الشاعر المهندس/ فاروق بن النيل

model يقول...

يا دكتور . يعني ليه التركيو على كل النواقص
طب شوية كده و شوية كدة
صور لنا الوجهع المشرق علشان الصورة ما تبقاش عتمة كده

يعني
و فات النص يا رمضان
و لسة في ناس بتجاهد
و ضد هواها و قلبها شاهد
و عين عالجنة و عين عالقرآن

يعني في السريهع كدة

على قدي

موديل

elsha3er يقول...

ندعوكم للمشاركة معنا فى جروب للمدونين على الفيس
http://www.facebook.com/home.php?sk=group_150308615029590#!/home.php?sk=group_150308615029590&ap=1

kochia يقول...

مسا الخير
الجماعة اللي ساكنين هنا راحوا فين ؟؟؟
المدونة وحشتني وجيت اشوف السكان
يارب تكون بكل خير ونشوف لك حاجة جديدة قريبا
تحياتي